Në katër vjetorin e vrasjes makabre të gjyqtarit të Vlorës, Skerdilajd Konomi, Unioni i Gjyqtarëve u bën apel autoriteteve që të hetojnë për të zbuluar dhe vënë para drejtësisë autorët. Gjatë një interviste për Top Channel, kreu i Unionit të Gjyqtarëve Gerd Hoxha e konsideron të pajustifikueshëm faktin që megjithë kohën që ka kaluar, nuk ka ende një version hetimor për krimin e tmerrshëm që i mori jetën gjyqtarit.
Për Unionin e Gjyqtarëve kjo ngjarje përcjell ende frikë tek gjyqtarët.
Nga ana tjetër bashkëshortja e Skerdilajd Konomit, ka vendosur këtë status në Facebook në të cilin shprehet: “4 vjet dhe askush nuk na ka bindur që jeta e njeriut që kërkon të drejtën e tij vlen më shumë se 400 gramë tritol në këtë vend”.
Çështja ndodhet që prej shtatorit 2014 në Prokurorinë e Krimeve te Rënda, ndërkohë që nga kontrolli i dosjeve gjyqësore që ka shqyrtuar gjyqtari Konomi rezulton, thonë burimet, se pista e vrasjes për shkak të dosjeve që kishte shqyrtuar apo kishte në shqyrtim është rrëzuar. Aktualisht prokurorët vijojnë të jenë në kërkim të provave për një pistë tjetër siç është ajo e betejës së pronësisë disa vjeçare që gjyqtari po ndiqte për disa hektarë toke në Hamallaj të Durrësit, tokë kjo e trashëguar nga të parët e tij.
