Këtë të premte Fryma e Re Demokratike ka festuar 4 vjetorin e themelimit të saj, ku ndër të pranishmit ishte edhe Kryeministri Edi Rama. Në fjalën përshëndetëse, kreu i FRD-së Bamir Topi risolli në vëmendje klimën konfliktuale në dy vitet e fundit të tij si Presidenti i vendit në raport me qeverinë Berisha.
“…në dy vitet e fundit të periudhës si President i Republikës u përballa me sulme të padenja të paprincipta. Sulme mjaft violente nga maxhoranca e kohës. Nuk dëshiroj t’i kthehem një kapitulli që tashmë është i mbyllur. Pikërisht këtu gjeta një motivim të fortë për të vazhduar politikën.”- tha Topi.
Topi i është drejtuar indirekt edhe Ish kryeministrit Berisha duke thënë se cdo njeri e ka një përfundim të ciklit.
“Çdo njeri e ka një përfundim të ciklit. mjaft nga ata që pa i përmendur, kanë krijuar probleme të jashtëzakonshme dhe ende vazhdojë të krijojnë probleme të jashtëzakonshme.”-shtoi ai.
Bamir Topi theksoi rëndësinë e korrigjimit të ligjit të zgjedhjeve, pasi siç tha ai, drejtësia fillon tek e drejta e votës.
“E kam të pamundur të mos i kthehem nevojës për korrigjimin e ligjit të zgjedhjeve. Eshtë diskutuar dhe diskutohet, madje është në fokus çështja e reformës në drejtësi. FRD ka shpalosur propozimet e veta në mënyrë zyrtare, duke qenë bashkëpunuese. Jemi koshient që drejtësia fillon tek e drejta e votës. Duhet një institucion korrekt i zgjedhjeve”- theksoi Topi.
