Nga ARTUR AJAZI
Edhe sot pas 10 vitesh, 21 Janari akuzon, 4 të vrarët duan dhe presin drejtësi. Edhe sot pas 10 vitesh, ata që i vranë, ata që qëlluan mbi protestuesit paqësorë, dhe që kishin synim edhe më tej, të vrisnin madje edhe kryetarin e Partisë Socialiste, janë të lirë, të pandëshkuar nga organet kompetente. Dhe në fakt, drejtësia dhe vetëm ajo, ka të drejtën dhe detyrimin të japë verdiktin e saj për ata që urdhëruan dhe fshehën vrasësit, për ata që mbrojtën snajperët e Gardës dhe rojet e ish-kryeministrisë. Katër të vrarët e 21 Janarit, prej sot janë Dëshmorë të Atdheut, sepse meritojnë nderime të tilla.
Ata ishin të pafajshëm, ata kishin ardhur të protestonin dhe mbështesnin opozitën e asaj kohe, me mendimin dhe shpresën e madhe, se qeverisja e asaj partie që njeh vetëm dhunën si mjet “demokratik”, do të ishte e përgjegjshme. Katër të vrarët e 21 Janarit dhe mungesa e ndëshkimit ligjor, janë akuza më e madhe ndaj ish-kryeministrit, ndaj ish-ministrit të Brëndshëm, ndaj drejtuesve të Gardës dhe snajperëve që zbatuan urdhërat kriminalë, por edhe hetuesve dhe prokurorëve, që kanë patur kohën dhe mundësinë të çojnë në qeli autorët e një krimi makabër.
Katër të vrarët e 21 Janarit, janë edhe sot shembëlltyra e një ish-qeverisje të shëmtuar dhe kriminale, e cila me vetëdije të plotë, përmes gojës së ish-kryeministrit deklaronte se “garditët janë heronj, të vrarët janë kamikazët e Ramës”. Dhe me të drejtë në ditën e përkujtimit të tyre, kryeministri Rama deklaroi se “sot ata që përdorën çekiçin e gjykatësit dhe sakatuan të drejtën e familjarëve për të parë drejtësi për 21 Janarin nuk duhet të harrohen, edhe pse një pjesë e tyre janë larguar nga sistemi si pjesë e llumit që vazhdon të pastrohet në atë sistem, një pjesë tjetër janë larguar duke dhënë dorëheqjen të vetëdijshëm që nuk mund ta kalonin filtrin e llumit, një pjesë tjetër janë akoma në punë se nuk i ka ardhur radha duke qenë se janë në shkallën e parë”.
Drejtësia për 21 Janarin është një detyrim standard i drejtësisë së re, e cila së fundmi ka nisur të lëvizë, duke kërkuar rihapjen e dosjes së vrasjeve të 4 Dëshmorëve të Atdheut. Ata prokurorë dhe gjyqtarë që menduan se me Vettingu dhe përjashtimin nga drejtësia i shpëtuan ndëshkimit ligjor, duhet patjetër të japin llogari para shqiptarëve, dhe thellësisht para familjarëve të 4 Heronjve të Atdheut. Partia Socialiste dhe personalisht kryetari i saj Edi Rama, kanë qenë konstant dhe të përhershëm në kërkesën e tyre për të dhënë drejtësi për 4 të vrarët e 21 Janarit, kanë qenë kërkues ndaj organeve të drejtësisë për të hetuar dhe gjykuar pa asnjë mëdyshje këdo që ka qenë në piramidën qeveritare, dhe që mban përgjegjësi ligjore për urdhërat e dhënë. Ka ardhur koha që drejtësia e re, të mbyllë në qeli jo vetëm zbatuesit e urdhërave kriminalë, por edhe vetë vrasësit me kollare.
Dhe natyrisht mungesa e ndëshkimit, u ka hapur rrugën atyre që të kërkojnë sërish pushtetin, tu premtojnë sërish shqiptarëve “qeverisje të mirë dhe parajsën”, kur dihet se si shkatërruan me konshiencë të plotë gjithçka jetësore në këtë vend.Ndëshkimi dhe dënimi i tyre nga drejtësia, janë i vetmi “shërim” për plagën e madhe të familjarëve, por edhe dëshmia e vetme që do të vërtetonte se ligji ka nisur të zbatohet në Shqipëri.
