Ministri i Brendshëm Taulant Balla, u bën thirrje të rinjve deri në moshën 30 vjeç, që të aplikojnë për t’u bërë pjesë e shkollës bazë së Policisë së Shtetit për “Patrullë të Përgjithshme”.
Në një reagim në rrjetet sociale, ministri Balla ka rreshtuar kriteret që kërkohen nga shkolla e bazë e Policisë për të ndjekur kursin “Patrullë e Përgjithshme”. Balla bëri të ditur se janë 300 vende, ndërsa thekson se aplikimet do të jenë të hapura deri në 30 nëntor 2023.
Balla e cilësoi lajm të mirë nisjen e aplikimeve për 300 vende në shkollën bazë të policisë për “Patrullë e Përgjithshme”.
Ministri i Brendshëm sqaroi se aplikimet janë të hapura nga data 02.11.2023 deri në datën 30.11.2023. Ai rreshton edhe kriteret e kërkuara për t’u pranuar në shkollën bazë të policisë.
“Mosha jo më shumë se 30 vjeç. Gjatësia jo më pak se 165 cm për djemtë dhe jo më pak se 160 cm për vajzat. Aplikanti nuk duhet të jetë i përjashtuar nga Policia e Shtetit, strukturat e tjera të sigurisë kombëtare. Të ketë zotësi të plotë për të vepruar dhe i aftë fizikisht për të kryer detyrën. Të ketë mbaruar të paktën arsimin e mesëm;Të mos jetë i dënuar me vendim gjykate të formës së prerë, për kryerjen e një krimi ose të një kundërvajtjeje penale me dashje. Të ketë dëshmi të aftësisë së drejtimit të automjetit, të tipit “B”. Të jetë i pajisur me vërtetim besueshmërie”, përfundon reagimi i ministrit Balla.
/a.r
