UPDATE, Ora 13:45/ Moti i keq dhe përmbytjet kanë shkaktuar 3 viktima. Pas zhdukjes në ujrat e lumit Mat të një personi, raportohet edhe për dy viktima të tjera. Në Tiranë, në zonën e Babrrusë u konstatua në ujrat e lumit trupi i pajetë i një shtetasi rreth 40-50-vjeçar.
Ndërkohë në komunën Sukë në Këlcyrë ka mbetur i vdekur një 50-vjeçar. Shtetasi K.Spahiu u rrëzua nga lartësia si pasojë e erës së fortë. Ai humbi jetën nga plagët e mara.
ORA 12:30/ Kryeministri Edi Rama ka mbledhur Zyrën Operacionale, pas përmbytjeve të shkaktuara nga reshjet e dendura të shiut gjatë 24 orëve të fundit.
Rama tha se gjendja është e pazakonshme, ndërsa shtoi se qeveria është angazhuar maksimalisht për të përballuar situatën.
“Gjendja është e pazakonshme nga reshjet. Reshjet vijojnë me intensitet e parashikohet të vazhdojnë. Jemi të angazhuar për të përballuar situatën”, u shpreh Rama.
Ndërkohë, drejtori i Emergjencave Civile, Shemsi Prençi, u shpreh se Shqipëria është vendi më i rrezikuar nga përmbytjet në rajon, për shkak të intensitetit të reshjeve. Ai tha se Emergjencat kanë marrë masat që në datën 4 të këtij muaji, për t’i bërë ballë kësaj situate.
“Shqipëria do të jetë vendi më i rrezikuar në rajon, për shkak të intensitetit të reshjeve. Kemi shpërndarë informacion për të gjitha ministritë, për situatën, në datën 4. Është përsëritur në datën 6. Në datë 7 e kemi ritheksuar edhe njëherë situatën,e kemi kërkuar ndihmën e policisë, zjarrfikëses dhe forcave të ushtrisë”, tha Prençi.
***
Përmbytjet kanë shkaktuar viktimën e parë. Një shtetas në Klos, Xhevahir Ndoj, 40 vjeç, është zhdukur në lumin Mat. Dyshohet se e ka marrë rryma e fortë e ujit.
***
***
Reshjet e dendura të shiut gjatë orëve të fundit kanë sjellë edhe problemet e para të shkaktuara nga përmbytjet.
Problematike paraqitet situata në Tiranë, Durrës, Lezhë dhe Fushë Krujë, ku rezultojnë të përmbytura disa lagje, ndërsa ka vështirësi edhe në qarkullimin e automjeteve.
Në Fushë Krujë probleme ka në fshatin Derven si pasojë e daljes nga shtrati të lumit Zezë.
Në Lezhë janë bllokuar blloqet e banimit në lagjen “11 Janari”.
Reshjet e dendura të shiut kanë sjellë edhe përmbytjen e autostradës Tiranë-Durrës. Siç duket edhe nga fotot, autostrada ka prezencë uji deri në disa centimetra. Kjo situatë ka sjellë edhe vështirësi në lëvizjen e automjeteve, ndërsa qarkullimi i tyre është devijuar në rrugën dytësore.
Probleme nga shirat janë shkaktuar edhe në qytetin e Tiranës ku janë përmbytur disa lagje në Don Bosko dhe Paskuqan.
Situata nga përmbytjet
Ora 09:17 Ministria e Brendshme: Situata nga përmbytjet, mblidhen Shtabet e Emergjencave
Pas situtates se krijuar per shkak te reshjeve, me urdher te ministrit te Puneve te Brendshme prane cdo Prefekture jane mbledhur Shtabet e Emergjencave.
Zonat me problematike per momentin jane:
Autostrada Tiranë-Durrës në segmentin kthesa e Kasharit – Vorë është e bllokuar nga vërshimi i ujërave.
Aktualisht niveli i ujit në kthesa e Kasharit është 50 centimetra.
Policia Rrugore ka ndërhyrë duke evakuuar disa qytetarë të cilët kishin mbetur të bllokuar në makina.
Ndërkohë disa banesa në kthesën e Kasharit rrezikohen të përmbyten.
Aktualisht qarkullimi i automjeteve në drejtim të Durrësit bëhet vetëm nga rruga e vjetër e Ndroqit.
Situatë problematike ndërkohë paraqitet edhe në aksin Lezhe – Shkoder, te Harku i Bërdicës, ku për shkak të vërshimit të ujërave të lumit Drin qarkullimi kryhet me vështirësi në drejtim të Velipojës.
Drejtoria e Përgjithshme e Emergjencave Civile u kërkon të gjithë qytetarëve të minimizojnë qarkullimin me automjete për shkak të situatës së krijuar.
Gjithashtu keshillohet qe fëmijët të mos lëvizin te pa shoqëruar nga të rriturit.
Drejtoria e Përgjithshme e Emergjencave Civile u bën thirrje qytetarëve të qëndrojnë larg lumenjve.
Ora 08:40 Situata e përmbytjeve në disa zona të prekura
Tiranë
Stafi i emergjencave dhe forcat e policisë në gatishmëri në disa zona. Raportohet për përmbytje në zonën e “Don Boskos” dhe Paskuqanit. Në zonat e prekura nga përmbytjet ka trafik të rënduar të automjeteve.
Reshjet e shiut ne Tirane
Fushë Krujë
Del nga shtrati lumi Zezë, përmbytje në fshatin Derven, në lagjen “Bakusha Visha”.
Durrës
Probleme në shëtitoren “Taulantia”, në rrugën “A.Goga”.
Vlorë
Dy tragete qëndrojnë në radë, nuk ankorojnë dot. Në tragete ndodhen 550 udhëtarë në pritje për të zbritur.
Ora 08:10 Reshje të dendura në disa zona të vendit, raportohen për përmbytje në Lezhë, Durrës dhe Fushë Krujë
