Ministrja e Arsimit, Lindita Nikolla në një deklaratë për mediat pohoi se faza e parë e aplikimeve për në Universitet është mbyllur. Duke marrë shkas nga zhvillimet e fundit në lidhje me protestën e disa maturantëve, që ndonëse kishin mesatare të larta, nuk fituan asnjë prej degëve të studimit, Nikolla theksoi se numri i atyre që ankimuan është shumë i vogël. Sipas Nikollës, numri në total i ankimimeve ka qenë gjithsej 287. Ajo shtoi më tej se shifrat flasin vet, duke iu përjigjur kështu gjithë skeptikëve për skemën e re të përzgjedhjes, ndërsa theksoi se nga raundi i parë u mësua se ‘më të mirët zgjedhin të parët’.
“216 ankimime në Universitetin e Tiranës, i Mjekësisë 28 ankimime. Gjithsej 287 aplikime, pra vetëm 0,06 për qind në total të aplikimeve për të vijuar studimet e larta. Shifrat flasin vetë, për transparencë dhe proces krejtësisht të ri për arsimin. Falenderoj Dekanët dhe Rektorët. Fituesit e raundit të parë do filloni regjistrimet në datën 13 shtator. Raundi i parë mësoi se më të mirët të përzgjedhin të parët.”, tha Nikolla.
Para pak ditësh, maturantë nga i gjithë vendi u hodhën në protestë, me pretendimin se në mënyrë të padrejtë u skualifikuan, duke mos u shpallur fitues në asnjë nga 10 degët që kishin zgjedhur.
BW/d.i.