Nisja e këtij aksioni në parlament, do të shënonte pikënisjen e një vale përjashtimesh nga Kuvendi i Shqipërisë për deputetët e Rithemelimit. Që prej datës 20 Tetor, Sekretariati i Etikës, në 7 mbledhje të zhvilluara ka përjashtuar 28 deputetë, disa prej tyre më shumë se dy herë.
Të përjashtuar 3 herë nga Kuvendi për 30 ditë
Flamur Noka
Bledion Nallbati
Saimir Korreshi
Gazment Bardhi
Flamur Noka, Bledion Nallbati, Saimir Korreshi dhe Gazment Bardhi kanë qenë deputetë më aktivë në rrëmujën e krijuar në sallën plenare dhe si rezultat janë përjashtuar 3 herë, duke mos qenë pjesë e aktivitetit parlamentar për 30 ditë. Flamur Noka, shumicën e përjashtimeve i ka marrë në mënyrë ekskluzive në sallën plenare, nga kryeparlamentarja Nikolla.
9 deputetë të tjerë, përfshirë edhe ish–kryeministrin Sali Berisha janë përjashtuar dy herë nga Kuvendi në më pak se dy muaj, duke munguar për 20 ditë në aktivitetin parlamentar.
Të përjashtuar 2 herë nga Kuvendi për 20 ditë
Sali Berisha
Ervin Salianji
Luan Baçi
Elda Hoti
Xhelal Mziu
Edmond Spaho
Lindita Metaliaj
Asllan Dogjani
Albana Vokshi
Ndërsa 15 të tjerë janë të përjashtuar vetëm 1 herë nga Kuvendi, për një afat kohor 10 ditësh.
Të përjashtuar 1 herë nga Kuvendi për 10 ditë
Isuf Çelaj Tritan Shehu
Kastriot Piroli Kasëm Mahmutaj
Greta Bardeli Edi Paloka
Flamur Hoxha Ina Zhupa
Petrit Doda Helidon Bushati
Lodovik Hasani Bujar Leskaj
Ramadan Likaj Sorina Koti
Lefter Geshtenja
E si mos të mjaftonte përjashtimi në komision dhe seancë, Kuvendi për ditë më radhë nuk i lejoi deputetët e Sali Berishës as në ambientet e brendshme të Godinës.
Në këto 7 mbledhje, Sekretariati i etikës ka bërë 44 përjashtime për deputetët e opozitës me një afat maksimal deri në 10 ditë.
Në kushtet e një aksioni pa kthim, mazhoranca nuk ka zgjedhur dialogun por ndëshkimin. Për këtë arsye ndryshoi rregulloren, duke e bërë afatin maksimal të përjashtimit deri në 60 ditë.
I pari që do i provojë pasojat e rregullores së re është Saimir Korreshi, së bashku me dy kolegë të tij, Edmond Spahon dhe Kastriot Pirolin.
Derisa rregullorja e re të shkojë në Gjykatën Kushtetuese ashtu si Rithemelimi ka paralajmëruar, në seancat e radhës deputetët do të duhet të zgjedhin nëse do t’i sofistikojnë metodat e revoltës apo do bëjnë një hap pas për t’i shpëtuar një përjashtimi dy-mujor nga parlamenti.
/a.r
