Janë mbi 2600 vende pune që presin të zihen nga qytetarët. Nëse jeni në kërkim të një pune dhe ende nuk keni gjetur diçka, atëherë do të ishte e udhës që të aplikoni online.
Në zyrat e punësimit ka mbi 2600 vende pune që presin për qytetarët e interesuar, në 65 qytete të Shqipërisë. Dhe këtë mund ta bëni fare mirë në faqen zyrtare të Shërbimit Kombëtar të Punësimit: puna.gov.al
Për të aplikuar, paraprakisht duhet të jeni i regjistruar në faqe. Pra të keni një llogari personale, duke i dhënë kështu të drejtën vetes jo vetëm për të parë ofertat për punë, por edhe për të aplikuar.
Mjafton të jepni të dhënat bazë si emri, mbiemri, ditëlindja, numri i kartës së identitetit apo adresa e postës elektronike, për të krijuar llogarinë personale.
Pas regjistrimit të këtyre të dhënave, sistemi dërgon automatikisht fjalëkalimin në adresën e postës elektronike, i cili mundëson aksesueshmërinë në faqe si dhe aplikimin për vendet e lira të punës. Në rast se vendet e punës të ofruara, nuk janë ato që ju kërkoni, atëherë mund të përzgjidhni edhe 3 profesione ku dëshironi të punësoheni.
Kjo ju mundëson ardhjen automatikisht të ofertave në kutinë e mesazheve, që përputhen me profesionin tuaj.
Aktualisht, në sistemin online të Shërbimit Kombëtar të Punësimit janë regjistruar mbi 37. 500 vetë.
