Eurostat-i, zyra për statistikat e Bashkimit Evropian, publikoi këtë javë të dhënat për azilkërkuesit e regjistruar gjatë vitit 2017. Numri i tyre është 650000, ose dy herë më pak se në vitin paraardhës, ose i njëjtë me atë të vitit 2014, para se të fillonte kriza e madhe e refugjatëve në vitet 2015-2016, për shkak të zgjerimit të konfliktit edhe në Siri.
Sikurse në vitet e mëparshme, edhe këtë vit numrin më të madh të azilkërkuesve në vendet e BE-së e përbëjnë sirianët (16 %), irakenët (7 %) dhe afganët (7%).
Këta i pasojnë azilkërkuesit që vijnë nga Nigeria, Pakistani, Eritrea etj. Vendi që ka regjistruar numrin më të madh të kërkesave për azil është Gjermania me (31%), e ndjekur nga Italia (20%), Franca (14 %), Greqia (9 %), Britania e Madhe me 5% të numrit të përgjithshëm të tyre etj.
Në këto të dhëna për vitin e kaluar, Shqipëria bën pjesë ende në listën e 10 vendeve me numrin më të madh të azilkërkuesve në vendet e BE-së. Por numri i tyre ka shënuar një ulje të ndjeshme në krahasim me vitet e mëparshme.
Kështu, nëse në vitin 2015 u regjistruan 65.935 kërkesa azili nga qytetarët shqiptarë, ky numër është 28.925 një vit më pas, pra, dyfish më i vogël. Kjo tendencë uljeje vërtetohet edhe në vitin 2017, me 22.075 kërkesa për azil.
Arsyet e zbritjes së këtij numri janë të ndryshme, por, siç vihet në dukje nga të dhënat e Eurostat-it, kërkesat e qytetarëve shqiptarë përbëjnë numrin më të madh të refuzimit të azilit në BE.
Një trajtim i tillë bëhet, si parim, edhe për kërkesat e azilkërkuesve të tjerë, që vijnë nga vendet e Ballkanit Perëndimor dhe që kanë përfituar tashmë nga procesi i liberalizimit të vizave. Vende konsiderohen të sigurta.
Për vitin në fjalë, numri më i madh i azikërkuesve shqiptarë është regjistruar në Francë, Islandë, Irlandë etj.
Përveç 650.000 kërkesave për azil të regjistruara në vendet e BE-së gjatë vitit 2017, sipas zyrës evropiane të statistikave mësohet se janë mbi një milion të tjera, të bëra një vit më parë dhe janë ende në shqyrtim e sipër, në pritje të një vendimi nga ana e autoriteteve të azilit.
Si zakonisht, numri më i madh i këtyre kërkesave është regjistruar në Gjermani, Itali, Austri, Norvegji etj. (Tema)
