Tre muajt e parë të vitit kanë rezultuar me më pak aksidente se e njëjta periudhë e vitit të shkuar.
Sipas të dhënave të bëra publike nga Instituti i Statistikave, nga Janari deri në fund të muajit Mars kanë ndodhur 301 aksidente. Krahasuar me tre mujorin e parë të vitit të shkuar, vërehet një rënie me 20% të aksidenteve rrugore.
Gjatë muajit të kaluar, sipas INSTAT kanë ndodhur 88 aksidente rrugore. Numri më i lartë i përplasjeve ka ndodhur nga ora 14 deri në orën 17.
Në tre muajt e parë të vitit kanë humbur jetën dhe janë plagosur 424 persona nga 525 që ishin vitin e shkuar.
Aksidentet rrugore, sipas INSTAT në 86 % të rasteve, kanë ndodhur si pasojë e sjelljes së drejtuesit të mjetit.
Gjatë 3-mujorit, numri më i lartë i tyre është kryer nga grupmoshat 35-44 vjeç.
Por, ndërsa drejtuesit e rinj në krahasim me vjet janë përfshirë më pak në aksidente rrugore, ajo që bie në sy është fakti se ka një tendencë rritëse të përfshirjes në ngjarje rrugore të personave mbi 60 vjeç.
