Çfarë po hetohet në këto 9 muaj të vitit 2016 në prokurorinë shqiptare dhe cila është dosja që ka sjellë kërcënimin e drejtpërdrejt dhe me jetë të prokurorit të përgjithshëm Adriatik Llalla?
Kjo përgjigje ende mungon si nga vetë prokurori Llalla dhe nga institucionet që po hetojnë mbi këtë situatë të krijuar nga muaji Korrik 2016 e deri ditët e para të shtatorit ku familja llalla, bashkëshortja dhe dy fëmijët kanë lënë Shqipërinë.
ReportTv sjell një vëzhgim të njoftimeve zyrtare të vetë prokurorisë ku rezulton se dosjet e këtij 9 mujori janë nga Sekuestro pronash në miliona eruo dhe deri në hetim pasurish për zyrtarë të lartë.
Më 6 Janar 2016 prokuroria njofton se ka vënë nën hetim biznesmenin Rezar Taçi me akuzën e mos pagimit të taksave.
Më 30 Janar me urdhër të prokurorisë vihet në pranga ish Ministri i Punës në qeverinë Berisha Spiro Ksera tashmë i dënuar me vendim gjykate.
Në ditën e parë të muajit shkurt në pranga vendoset me kërkesë të prokurorisë kreu i hipotekës Shkodërs dhe Drejtori Rajonal i Shëndetit Publik në Devoll.
Pak ditë më pas më 7 Shkurt prokuroria vë nën sekuestro një pasuri miliona euroshe në bregdetin e velipojës, plot 9 pallate dhe administrator i kësaj pasurie rezulton biznesmeni Sait Fishta.
Më 13 Shkurt prokuroria përfundon hetimet dhe dërgon në gjyq 13 persona mes tyre dhe Admir Tafilin të konsideruar kreu i organizatës kriminale të vrasjeve me pagesë.
17 Shkurt do të sekuestroheshin me kërkesë të prokurorisë 75 h truall në Kavajë dhe këtë ditë vetë Llalla do të ishte i pranishëm në Kavajë duke kërkuar hetimin e cdo dosje pronësie mbi të cilën kishte dyshime për falsifikim.
Një ditë më pas në Kryeqytet më 18 shkurt do të ndalohej drejtori i Tatimeve të kryeqytetit Androkli Kokthi, tashmë i lirë.
Më 9 Mars një hotel me vlerë miliona euro sekuestrohet në Vlorë me kërkesë të prokurorisë së Krimeve të rënda pas një hetimi të miratuar nga prokurori i përgjithshëm.
Prilli do të ishte muaji që do të lidhte firmën e prokurorit me grupet terroriste, më 5 prill ai do të aprovonte kërkesën e vartësve për të dënuar me 152 vite burgim rekrustuesit e Xhihadistëve apo njohur ndryshe si Imamët e vetëshpallur.
Dy ditë më pas më 7 Prill në gjykatë do të përfundonte dosja “Xibraka” hetimet të cilat lidhen drejtpërsëdrejti me laboratorik e kokainës zbuluar në bashkëpunim me policinë dhe prokurorinë e partnerët gjerman në Janar të 2015.
Më 8 Prill 2016 prokuroria kërkon gjykatë konfiskimin e pasurisë prej 3.2 milion USD dhe 450 mijë euro, pasuri të Kastriot Ismail ish administratorit të borxheve të Cez nën hetim e gjykim për mashtrim dhe vjedhje me pasoja të mëdhaja.
Më 18 Prill Prokuroria e Krimeve të rënda pas një takimi të prokurorit të përgjithshëm me vartësit e tij dhe drejtorin e Policisë Haki Cako urdhëron ndalimin e Emiliano Shullazit. Shullazi prej asaj ditë qëndron nën arrest ndërsa prokuroria e ka nën hetim për dyshime në lidhje me gjobvënie kërcënime dhe shantazhe përfshi dhe atë ndaj dy profesorëve Dhori Kule e Mynyr Koni.
Një ditë më pas akuza e Durrësit vë nën sekuestro ish Hotel Vollgën në Durrës, objekt në Pronësi të Shullazit të cilën ai e kishte fituar me kontratë trashëgimie të firmosur para noterit.
Më 31 Maj prokuroria sekuestron në Vlorë pronë të paluajtshme në vlerën e 100 milion eurove, plot 220 h truall në Karaburun.
Më 1 qershor në hetim për falsifikim dokumentesh vihet kryebashkiaku i Kavajës Elvis Roshi, hetim i cili nis pak orë pas takimit të kryeprokurorit llalla me kreun e KQZ Lefteri Lleshi në zbatim të ligjit të dekriminalizmit.
Pak ditë më pas më 13 qershor prokuroria kërkon arrest me burg për Roshin, por gjykata e rrëzon këtë kërkesë duke detyruar hetim në gjendje të lirë.
Gjatë qershorit listës së sekuestrove i shtohet sërish prona në Vlorë dhe këtë herë arrihet në vlerën e 200 milion eurove përfshi troje dhe hotele të përfituara me falsifikim dhe burim parash nga droga e prostitucioni.
Më 27 Qershor me firmë të vartësve të tij Kryeprokurori Llalla miraton pretencën me 175 vite burg për bandën e babagjyshve, banda e drejtuar nga i dyshuari Ilir Kupa që nën kërcënimin e armëve grabisnin argjendari e biznese shërbimi.
Më 18 korrik prokuroria vë nën hetim gjyqtaren e lartë Majlinda Andrea dhe kërkon pezullimin e saj nga detyra.
Më 23 Gusht prokuroria e përgjithshme njofton se krimet e rënda sekuestrojnë pasurinë e ish deputetit Kristian Demokrat Mark Frroku i cili është nen akuza për vrasje, pastrim parash e ndërtim të paligjshëm.
Dosja e fundit e regjistruar penalisht për të cilën prokuroria e përgjithshme ka bërë njoftim zyrtar është ajo e hetimit të dhunimit të biznesmenit Libanez Fadi Mitri dhe sekuestrimit të pronës prej 45.000 m2 truall në bregdetin e Lalëzit.
Por cila nga këto dosje ka kërcënuar Llalën këtë mund ta thotë vetëm ai dhe hetimi që vartësit e tij duhet të kryejnë për këtë rast të konsideruar vërtet të rëndë./a.k
