Surpriza e ndeshjes Rumani-Shqipëri ishte Borin Shehu, djali nga Tirana që fitoi çmimin e UEFA-s, si tifozi më i mirë i Kombëtares. Borin rrëfen për dritare.net, për idenë e realizimit të shqiponjës dhe emocionet e fitores. Por ai ka një surprizë tjetër nëse Shqipëria kualifikohet.
Dritare.net- Çfarë bën Borin, cila është jeta jote?
Unë jam student për produksione audiovizuale. E ndaj kohën ndërmjet Francës, Luksemburgut dhe Shqipërisë.
Dritare.net- Je tifoz i zjarrtë i Kombëtares, ke parë çdo ndeshje të saj?
I ndjek rregullisht ndeshjet e Shqipërisë, jo gjithmonë në stadium. Përpara ndeshjes me Rumaninë, ndoqa në stadium miqësoren kundër Luksemburgut ku fituam.
Dritare.net- Si të lindi ideja e realizimit të një shqiponje të tillë, ku e more spunton dhe pse e realizove në këtë ndeshje?
Ideja lindi gjatë zhvillimit të një filmi të zhanrit fantazi. Kisha dëshirë që histori të ishte shqiponja dykrerëshe dhe mendova se do ish bukur të kishte një shqiponjë në një ndeshje të kombëtares. Ne kemi një flamur shumë të bukur dhe domethënës mbi historinë tonë. Kostumin e realizova për ndeshjen me Francën por nuk munda të ikja në Marseille por e pashë ndeshjen me kostumin e vënë në sheshin ku ndiqej kampionati në Luksemburg.
Dritare.net- Sa kohë tu desh për ta realizuar?
Për ta realizuar mu desh pothuaj një ditë e plotë.
Dritare.net- Si u prit nga tifozët përreth kur të panë, cilat qenë komentet?
Tifozët e pritën shumë mirë kostumin. Ishin shumë të kënaqur nga angazhimi im dhe disa kërkonin të bënim foto bashkë. Ndër to kishte dhe tifozë të Rumanisë që kërkonin foto dhe më përgëzonin për punën e kryer.
Dritare.net- Si u përzgjodhe nga UEFA dhe si u ndjeve kur more çmimin?
Duke hyrë në stadium më panë dhe më propozuan një foto pasi më shpjeguan që kostumi ose më i mirë e origjinal do të afishohej në ekranin e stadiumit, dhe do të merrte titullin tifozi i ndeshjes. U gëzova kur e pashë megjithatë gëzimi i fitores së Kombëtares i tejkalonte të tjerat.
Dritare.net- Je i lumtur me Kombëtaren dhe fitoren e saj, çfarë pret të ndodhë më pas? Nëse Shqipëria vazhdon të luajë do sjellësh diçka të re?
Jam shumë i lumtur me Kombëtaren. Ekipi është fantastik dhe japin gjithmonë më të mirën dhe trajneri De Biasi vazhdon ta rrisë nivelin e arritjeve së Kombëtares. Jam shumë i lumtur dhe me tifozët që treguan një Shqipëri të mrekullueshme. Nëse kualifikohemi kostumi do jetë i ribërë në një mënyrë të re.Kam disa ide për disa efekte speciale për ta bërë akoma më të denjë për Kombëtaren tonë.
Dritare.net- Një urim për kuqezinjtë…
Urime të gjithëve për fitoren./dritare.net
ma.me
