Ambasadorja e Bashkimit Eruopian në vendin tonë, Romana Vlahutin, teksa ka folur për integrimin e Shqipërisë në Bashkimin Europian në një tryezë me aktorët joqeveritarë, ka thënë se vendi ynë duhet të plotësojë kushtet për integrim dhe se Shqipëria nuk duhet të ndalet. Ajo ka shtuar se vendi ynë ka nevojë për politika të shëndetshme, pasi rruga e integrimit evropian nuk është e lehtë.
“Shqipëria nuk duhet të ndalojë. Rruga e integrimit evropian është e vështirë. Të plotësohen kushtet e integrimit, pasi integrimi nuk është ushtrim, por ndryshim jetësor për çdo qytetar. Duhen politika të shëndetshme e të frytshme” ka thënë Valhutin.
Ambasadorja ka theksuar se, janë shqiptarët ata që duhet të përjetojnë çdo ndryshim, sidomos atë të sistemit të drejtësisë. Ndërkohë, ka deklaruar se në mënyrë që Shqipëria të shkojë drejt BE-së ajo duhet të arrijë një nivel tjetër.
“Shqiptarët duhet që të përjetojnë ndryshimin e sistemit të drejtësisë. Shqipëria drejt Bashkimit Europian duhet të arrijë në një nivel tjetër. Njerëzit duhet të kuptojnë se për çfarë bëhen reformat. Numri i reformave që duhen bërë është shumë i lartë. Ndryshimet duhet të bëhen përmes reformave për të siguruar anëtarësim dhe zhvillim të vendit’ tha Vlahutin teksa shtoi se nuk ndryshohen politikat çdo 8 vite, pasi politikat janë për një cilësi më të mirë jete.
ma.me
