Unioni i Gjyqtarëve të Shqipërisë ka reaguar lidhur me protestën e mbajtur paraditen e sotme para Gjykatës Administrative të Apelit, e cila ishte thirrur nga kreu i Bashkisë së Tiranës, Erion Veliaj.
Në një reagim për mediat, Unioni i Gjyqtarëve të Shqipërisë shprehin shqetësim për trysninë e krijuar, sipas tyre, ndaj trupës gjyqësore.
“Protesta ka penguar punën e Gjykatës dhe ka cënuar imazhin e saj. Kërkojmë që të ndërpritet trysnia ndaj gjykatave, pasi rrezikon pavarësinë e tyre” thuhet në reagimin e Unionit të Gjyqtarëve të Shqipërisë.
REAGIMI I PLOTE
Në datën 11.05.2016 përpara godinës ku ushtron veprimtarinë e saj Gjykata Administrative e Apelit, u mbajt një protestë e cila filloi në orën 10:30 dhe zgjati deri në orën 13:15. Nga mediat kemi ardhur në dijeni se protestën e ka thirrur dhe organizuar Kryetari i Bashkisë Tiranë Z.Erion Veliaj. Duke respektuar të drejtën e protestës së gjithkujt, në format dhe mënyrat që parashikon ligji, ngremë shqetësimin tonë në lidhje me ushtrimin e trysnisë ndaj gjithë trupës gjyqësore të Gjykatës Administrative të Apelit lidhur me çështje konkrete, të cilat janë ende në gjykim.
Ushtrimi në këto përmasa i trysnisë ndaj gjykatës, nga palë ndërgjyqëse, qofshin këto edhe institucione shtetërore është i paprecedentë. Mënyra e zhvillimit të kësaj proteste përpara godinës së gjykatës jo vetëm ka penguar funksionimin normal të veprimtarisë së Gjykatës Administrative të Apelit për disa orë, por ka cenuar në mënyrë të padrejtë imazhin e gjykatës. Në këto rrethana, kërkojmë nga organet kushtetuese vendimmarrëse në lidhje me gjykatat, që të ushtrojnë autoritetin e tyre kushtetues dhe ligjor për të ndërprerë çdo lloj trysnie jo vetëm ndaj gjyqtarëve të Gjykatës Administrative të Apelit por edhe gjithë gjykatave të tjera.
Lutemi gjithashtu organizmave ndërkombëtarë, që veprojnë në Shqipëri të mbikëqyrin situatën dhe të ushtrojnë sadopak ndikimin e tyre, për eliminimin e çdo forme të presionit ndaj Gjykatës Administrative të Apelit në veçanti dhe gjithë gjykatave në përgjithësi, pasi ky fenomen i përsëritur po kërcënon rrezikshëm pavarësinë e sistemit.
D.I.
