Ministri i Drejtësisë, Ylli Manjani, raportoi sot në Komisionin e Ligjeve lidhur me inspektimet që Ministria e Drejtësisë ka bërë në 8 Prokurori të vendit.
Manjani foli me tone të ashpra ndaj Prokurorëve, duke thënë se shumë çështje penale flenë nëpër sirtarët e prokurorive.
“Prokurorët shqiptarë janë dembelë, pasi të tillë i ka krijuar sistemi”, tha Manjani para anëtarëve të Komisionit të Ligjeve.
“Kontrolli që kemi ushtruar në Prokurori të ndryshme ka qenë i planifikuar. Ankesat për shërbimin e Prokurorisë në ministri janë të një numri të lartë, që tregon besimin e ulët të publikut në këtë institucion”, tha ai.
Manjani vërejti se duhen ndryshime të mëdha në Kodin e Procedurës Penale.
