Prokuroria dhe Policia kanë deklaruar nisjen e hetimeve në Shqipëri për skandalin financiar Panama Papers, pas të dhënave se vendi ynë mund të ketë lidhje me këtë çështje. Me një komunikim jozyrtar, Drejtoria e Pastrimit të Parave në Policinë e Shtetit, njoftohet se ka nisur hetimet për akuzën e “pastrimit të parave”, shkruan Panorama.
Hetimi fillimisht vërtitet rreth emrave të shtetasve shqiptarë e të huaj dhe kompanive që mendohet se kanë vepruar dhe nga Shqipëria. Objekt i hetimit, të paktën për Policinë, duket se është biznesmeni Ismail Mulleti, i cili aktualisht nuk gjendet në Shqipëri. Ai ka dalë nga vendi me një linjë ajrore drejt Turqisë në datën 14 mars 2016 dhe nuk rezulton të jetë kthyer më në vendin tonë.
Nga hetimi nuk janë përjashtuar edhe ortakët që kanë pasur apo që janë në lidhje me bizneset e Ismail Mulletit. Më konkretisht, përveç biznesmenit 52vjeçar të njohur në Shqipëri për aktivitetin e tij pas viteve ‘90, në hetim janë edhe ortaku i tij izraelit, Assaf Halkin, dhe një shtetas zviceran. Hetimi ka përfshirë ndërkohë edhe tri kompani që Ismail Mulleti dhe ortakët e tij kanë pasur në Shqipëri.
Kompanitë për të cilat hetuesit kanë mbledhur dje informacion janë “GFI Techonologies”, themeluar në 2013n, “Egnatia exportimport”, krijuar në 1995n dhe “IMAH”. Përveç dokumentacionit ligjor në lidhje me aktivitetin, kohën e krijimit, zyrat etj., për këto tri kompani policia po mbledh informacione në lidhje me aktivitetin bankar dhe transfertat financiare brenda e jashtë vendit.
PROKURORIA
Krahas hetimit të nisur nga Sektori Kundër Pastrimit të Parave në Polici, edhe Prokuroria e Përgjithshme duket se ka urdhëruar nisjen e verifikimeve. Burime zyrtare të organit të akuzës thanë se Prokuroria e Përgjithshme po bashkëpunon me institucionet e tjera ligjzbatuese “për të qartësuar situatën mbi përfshirjen e mundshme në çështjen ‘Panama Papers’ të kompanive ose shtetasve shqiptarë apo të huaj që veprojnë në tregun financiar shqiptar”.
Panorama