Nigeria u ndesh me Egjiptin të premten e kaluar, për kualifikueset e Kupës së Afrikës. Në Kaduna, 40 mijë shikues ndoqën takimin e zhvilluar në stadiumin që ka vetëm 16 mijë vende.
Vendimi i organeve lokale për të hapur dyert për tifozët rezultoi i gabuar, pasi stadiumi u tjembush, ndërkohë që qershorin e kaluar aty ka pasur shumë probleme nga pushtimi i fushës prej spektatorëve.
Shumë prej tyre u kacavirën ku mundën, pa kushte minimale të sigurisë për jetën. Dhjetëra prej tyre hipën mbi ndërtesat pranë stadiumit, mbi kullat e ekraneve, te projektorët ndërsa një numër i frikshëm pushtoi skelën e e lartë metalike.
Fatmirësisht, nuk pati aksidente, ndërkohë që në fushë Nigerisë i iku fitorja për tri minuta, pasi Egjipti barazoi dhe takimi u mbyll 1-1.
