Në fushat e Akërnisë, shenjat e rrotave të ngjashme me ato të avionëve sportivë janë evidente.
Banorët thonë për gazetën Panorama se herë pas here kanë dëgjuar zhurmat e avionëve që vijnë në këtë zonë, por nuk kanë informacion se kush mund të jenë pritësit e tyre me qëllim për të ngarkuar tonelatat me drogë.
Fushat janë në distancë të konsiderueshme me aerodromin e Akërnisë, pasi pilotët u druhen rojeve të mundshme apo patrullimeve të policisë në të. Banorët japin të dhëna që përkojnë logjikshëm me veprimet e mundshme të pilotëve, në tentativë për t’u ngarkuar dhe larguar pa u diktuar nga policia. Sipas tyre, herë pas here kanë dëgjuar zhurma të avionëve, sidomos herët në mëngjes pa u zbardhur mirë dita.
Një tjetër detaj i dhënë prej tyre ka të bëjë me sinjalizimin që japin trafikantët për pilotin para se ky i fundit të japë manovrën e uljes. “Pilotët njoftohen me anë të zjarrit se ku duhet të ulin avionët. Pasi më parë është kontrolluar terreni nga trafikantët, ata e japin garancinë e uljes së avionit me anë të zjarrit. Me sa duket, pilotët ulen në fushë për t’u ngarkuar, vetëm kur shohin në ajër zjarrin e ndezur. Këto mund të jenë kode të trafikantëve me pilotët. Shpeshherë dëgjojmë zhurma avionësh gjatë natës dhe në orët e para të mëngjesit”, shprehen banorë të Akërnisë.
Për shkak të çështjes delikate dhe frikës, ata nuk duan të identifikohen, por pranojnë se kanë qenë dëshmitarë të zjarreve të ndezur në distancë, e më pas kanë dëgjuar zhurmat e avionëve të vegjël që ulen afër fshatit të tyre. Por ka edhe banorë të cilët pohojnë se i kanë parë këta avionë, të cilët bëjnë ulje në këtë zonë.
Sipas tyre, fluturojnë në distanca të ulëta me tokën drejt Italisë, pasi kjo pengon pikasjen e tyre nga radarët. Praninë e avionëve e konfirmojnë qartazi shenjat në bar. Janë disa shenja në fushat e Akërnisë që tregojnë të njëjtin fakt. Ndërkaq, policia ka liruar tre persona që shoqëroi një ditë më parë. Ata janë çobanë që kanë një stan afër vendit ky dyshohet se është ngritur avioni i ngarkuar me drogë.
Sipas Policisë, ata janë N. Mehmetaj dhe dy djemtë e tij, A. Mehmetaj dhe K. Mehmetaj. Ata u lanë të lirë pasi hetimet nuk konkluduan në ndonjë të dhënë konkrete se tre familjarët mund të kenë lidhje me ngjarjen. Shoqërimi i tyre u bë pasi policia u sinjalizua për një avion të ngarkuar me drogë në këto fusha, dhe që ka marrë drejtim Italinë.
Ndërkaq, dje Policia e Vlorës ka krehur të gjithë zonën për të gjetur prova të trafikut dhe mundësinë e uljes së avionëve, si dhe janë pyetur banorë me qëllim për të identifikuar persona të mundshme të dyshimtë. Prokuroria e Krimeve të Rënda i ka kërkuar të dhëna Aviacionit Civil për ndonjë kërkesë për leje ose raport informacioni në lidhje me fluturimin e ndonjë avioni tip “Piper” në Shqipëri në muajin mars.
Ndonëse të dhënat nuk kanë mbërritur ende, dyshohet se avioni në fjalë ka lëvizur pa informuar autoritetet dhe pa leje. Madhësia është e tillë që nuk përjashtohet dyshimi se mund të jetë çuar edhe me kamion me karroceri të mbuluar në vendin e nisjes dhe më pas ka fluturuar në lartësi të ulët ku nuk kapet nga radarët që ka në përdorim Shqipëria.
Nga pala italiane verbalisht dhe në mënyrë paraprake thuhet se avioni ka qenë tip i vogël “me një helikë” dhe se drejtuesi i ndaluar nuk ka pranuar të japë të dhënat e identitetit të tij. Po kështu raportohet se nuk i janë gjetur dokumente me vete, pasi mendohet se i ka hedhur në det bashkë me ngarkesën e drogës.
Panorama
