Ministri i Jashtëm, Ditmir Bushati, ka nisur vizitën zyrtare dyditore në Greqi, ku është takuar me Presidentin Prokopis Pavlopulos.
Sipas televizionit shtetëror grek, ERT, presidenti Pavlopulos i ka dhënë tre mesazhe të qartë ministrit shqiptar, për të cilat është biseduar: Çështja e refugjatëve, trajtimi i minoritetit grek në Shqipëri dhe zgjidhja për çështjen e varrezave të ushtarëve grekë rënë gjatë Luftës së Dytë Botërore.
Pavlopulos i ka thënë Bushatit se Greqia dëshiron marrëdhënie të mira me Shqipërinë, gjë që e ka treguar në shumë raste, siç ishte mbështetja për hyrjen në NATO apo në BE.
Bushati e falënderoi presidentin grek për pritjen dhe vuri në dukje dëshirën për ta thelluar bashkëpunimin me Greqinë, si partnerë strategjikë dhe anëtarë të NATO-s.
Por, si aleatë ushtarakë, Bushati i ka kërkuar presidentit që Greqia të heqë ligjin e luftës me Shqipërinë, “një relike e së kaluarës, çka do të na japë mundësi të mbyllim një kapitull të marrëdhënieve tona”.
Lidhur me minoritetin grek, Bushati siguroi presidentin Pavlopulos se Shqipëria respekton të gjitha ligjet ndërkombëtare, duke kërkuar integrim më të mirë të komunitetit shqiptar në Greqi, i cili ka ardhur në rritje.
Për krizën e refugjatëve, ministri Bushati shprehur solidaritet me Greqinë për vështirësitë që po kalon, duke theksuar se “ksenofobia është diçka që nuk na përket”. “Ne do të nderojmë të gjitha vlerat europiane dhe do të japim kontributin tonë në BE për zgjidhjen e problemit të refugjatëve”.
Bushati i shprehur mirënjohjen Greqisë për mbështetjen në rrugën Euro-Atlantike, me besimin se marrëdhëniet dypalëshe do të ndërtohen në një të ardhme të begatë, bazuar në vlerat europiane.
JavaNews / Përgatiti Dritan Ikonomi
