Policia ka publikuar sot fotografitë e të arrestuarit Bujar Xhaferri, i cili akuzohet se ka vrarë mëngjesin e sotëm Skënder Alukun, babain e Altin Alukut, i cili një vit më parë vrau vëllain e autorit, Lutfi Xhaferrin.
Në datën 17.05.2015, rreth orës 05.30, viktima Lutfi Xhaferi dhe e dëmtuara Naime Xhaferi, kanë dalë nga banesa e tyre e ndodhur në fshatin Kashar dhe së bashku kanë shkuar në lagjen “Kamberaj” të këtij fshati, me qëllim për të pritur furgonin, me të cilin e dëmtuara do të shkonte në Tiranë për të shitur qumësht dhe produkte të tjera fshati.
Rreth orës 05.45, drejt tyre është afruar i pandehuri Altin Aluku (Kashari) i cili ecte në këmbë dhe mbante në dorë një armë automatike model 56, të rregullt teknikisht dhe që e mbante pa leje.
Mbasi u është afruar në një distancë prej rreth 5 metrash, i pandehuri i është drejtuar fillimisht viktimës duke i thënë që “Ju më keni qëlluar mbrëmë tek shtëpia”.
Viktima Lutfi Xhaferi i është përgjigjur duke i thënë se “Jo. Ne nuk kemi asgjë me ty dhe nuk kemi pasur ndonjëherë”.
Menjëherë pas këtyre fjalëve të viktimës, i pandehuri ka qëlluar disa herë me armën që mbante në dorë në drejtim të viktimës duke i shkaktuar atij vdekjen e menjëhershme. Mandej ka drejtuar armën dhe ka qëlluar edhe në drejtim të së dëmtuarës Naime Xhaferi, duke i thënë që “do t’ju zhduk të dyve”.
E dëmtuara është afruar drejt tij dhe është përpjekur që t’i kapte armën, me të cilën i pandehuri vazhdonte që të qëllonte në drejtime të ndryshme.
Ajo ka arritur që t’ia kapë armën, por i pandehuri ka mundur që të shkëputet dhe duke u larguar ka qëlluar përsëri drejt saj duke e plagosur në dorën e majtë, raporton Panorama.
Pas ngjarjes, autori është identifikuar dhe është arrestuar.
