Një qytet i vetëm i aftë për të kërcënuar shtatë kryeqytete: Kaliningradi, një enklavë dhe kështjellë ruse e vendosur midis Polonisë dhe vendeve baltike, mban falangën e trefishtë të raketave të evokuara dje nga Kremlini. Këto janë armë bërthamore të drejtuara drejt Berlinit, Stokholmit, Helsinkit, Varshavës, Kopenhagës, Rigës dhe Vilniusit, të cilat e trembin NATO-n. Qyteti – siç shpjegon Repubblica – ka qenë një kështjellë për shtatë shekuj dhe është simboli i përplasjes mes Perëndimit dhe Lindjes.
Historia e këtij qyteti nis nga larg: në të kaluarën quhej Konisberg dhe ishte “atdheu” i kreshnikëve teutonikë të përfshirë në kryqëzatën kundër sllavëve, më pas ishte kryeqyteti i Prusisë. Në vitin 1944, pas bombardimeve të Aleatëve, Stalini kërkoi aneksimin e tij, pavarësisht se ishte ai vend shumë larg kufijve rusë. Arsyeja? Ai kishte nevojë për “një port që nuk ngrin”. Qyteti përfundimisht vazhdoi të ishte nën pushtetin rus edhe pas rënies së BRSS. Një post i vendosur në mes të Evropës .
Me ardhjen e Putinit në pushtet në Rusi, Kaliningradi është kthyer gjithnjë e më shumë në një bllok: bunkerët e Ushtrisë së Kuqe janë riaktivizuar dhe një rrjet nëntokësor tunelesh dhe magazinash është zbuluar. Qyteti – shkruan Repubblica- teknikisht quhet A2 / AD që është “Anti-Access / Area Denial” ose gjithashtu “flluska raketore” dhe përfaqëson një kështjellë të aftë për të parandaluar kalimin e kujtdo që nuk është i mirëpritur. Si?
Nëpërmjet vendosjes së armëve më moderne dhe më të rrezikshme, si raketat kundërajrore S-400, raketat kundër anijeve Bastion, Iskanderi hipersonik. Dhe edhe nëse prania e armëve bërthamore nuk është pranuar kurrë, mendohet se kokat bërthamore kanë qenë aty që në ditët e BRSS. Që nga fillimi i luftës në Ukrainë, arsenali është pasuruar me bomba Kinzhal dhe raketa Kalibr.
