Presidenti i Shteteve të Bashkuara, Joe Biden, njoftoi se administrata e tij ka marrë vendim për të mbyllur hapësirën ajrore të SHBA-së për të gjitha fluturimet ruse.
Veprimi pason masa të ngjashme, të ndërmarra nga vendet evropiane dhe Kanadaja, në përgjigje të pushtimit rus të Ukrainës.
Duke folur para Kongresit amerikan për gjendjen në vend, Biden tha se ndalesa do ta izolojë edhe më shumë Rusinë dhe do ta rëndojë edhe më shumë ekonominë e saj. Rubla ruse ka humbur 30% të vlerës së saj, tha Biden.
Perëndimi ka vendosur sanksione të ashpra kundër Rusisë për ndërhyrjen ushtarake në Ukrainë. Sanksionet përfshijnë edhe përjashtimin e disa bankave ruse nga sistemi bankar global SWIFT. “Ekonomia e Rusisë po lëkundet dhe fajin e ka vetëm [presidenti rus, Vladimir] Putin”, tha Biden.
“Ai hodhi poshtë përpjekjet në diplomaci. Ai mendoi se Perëndimi dhe NATO nuk do të përgjigjeshin”, pritet të thotë Biden.
“Dhe, ai mendoi se mund të na ndante këtu në shtëpi. Putini e kishte gabim. Ne ishim gati.”
Biden ka bërë të ditur se do të nisin hetimet edhe për oligarkët rusë që janë krah Putin në këtë luftë të përgjakshme.
“Sonte, unë u them oligarkëve rusë dhe liderëve të korruptuar që kanë harxhuar miliarda dollarë nga ky regjim i dhunshëm, jo më shumë,” tha Biden gjatë fjalimit të tij ndërsa njoftoi një grup të ri pune nën Departamentin e Drejtësisë të SHBA për të hetuar oligarkët rusë.
“Ne po bashkohemi me aleatët tanë evropianë për të gjetur dhe kapur jahtet e tyre, apartamentet e tyre luksoze dhe avionët e tyre privatë. Ne po vijmë për përfitimet tuaja, SHBA po mbyll gjithashtu hapësirën e saj ajrore për avionët rusë, duke iu bashkuar një numri vendesh që morën masa të ngjashme javën e kaluar, “duke izoluar më tej Rusinë“, tha Biden.
Ai më pas shtoi, duke iu referuar Putinit: “Ai nuk e ka idenë se çfarë po vjen. Putini ka lëshuar dhunë dhe kaos. Por ndërsa ai mund të bëjë fitime në fushën e betejës – ai do të paguajë një çmim të lartë të vazhdueshëm në afat të gjatë.
g.kosovari
