Presidenti Ilir Meta ka dënuar pushtimin e Ukrainës nga Rusia. Kreu i shtteit i bën thirrje Rusisë të tërhiqet nga veprimet ushtarake, siç thotë ai kundër integritetit territorial dhe sovranitetit të Ukrainës. Meta thekson se Shqipëria qëndron me Ukrainën dhe popullin e saj.
“Shqipëria dënon sulmin e pajustifikueshëm të Rusisë ndaj Ukrainës, duke shkelur ligjin ndërkombëtar dhe duke kërcënuar jetën e civilëve të pafajshëm. I bëjmë thirrje Rusisë të tërhiqet nga veprimet ushtarake kundër integritetit territorial dhe sovranitetit të Ukrainës! Shqipëria qëndron me Ukrainën dhe popullin e saj në këtë orë të errët!” shkruan Meta.
Ndërkohë, edhe kreu i PD-së, Lulzim Basha ka dënuar sulmin e Rusisë në Ukrainë, teksa thotë se është një shkelje e rëndë e ligjit ndërkombëtar. Basha i bën thirrje OKB-s, NATO- dhe BE-s që të përgjigjen në mënyrë ët shpejtë dhe të bashkuar.
“Ne, Partia Demokratike e Shqipërisë dënojmë ashpër agresionin ushtarak të Rusisë kundër Ukrainës, një shkelje e rëndë e ligjit ndërkombëtar. Ne qëndrojmë pranë popullit të Ukrainës ndërsa ata përballen me kërcënime për jetën e tyre nga agresioni i paprovokuar rus. Ne bëjmë thirrje dhe mbështesim një reagim të shpejtë, të bashkuar dhe të fortë nga OKB, NATO dhe BE kundër këtij akti lufte kundër lirisë dhe sovranitetit të Ukrainës dhe kundër paqes dhe stabilitetit në Evropë dhe më gjerë”, shkruan Basha në Twitter.
Sakaq, ministrja e Jashtme shqiptare Olta Xhaçka ka reaguar duke e dënuar me forcë nisjen e pushtimit rus në Ukrainë, për të cilin thotë se është një sulm i paprovokuar. Në një reagim në Tëitter, ministrja e Jashtme e Shqipërisë thotë se sulmi “rrezikon jetën e miliona njerëzve të pafajshëm, minon themelet e rendit ndërkombëtar dhe shkel Kartën e OKB-së”.
Reagimi i ministres së Jashtme shqiptare Olta Xhaçka:
Shqipëria dënon me forcë sulmin e paprovokuar ushtarak të Rusisë ndaj Ukrainës. Ky sulm rrezikon jetën e miliona njerëzve të pafajshëm, minon themelet e rendit ndërkombëtar dhe shkel Kartën e OKB-së.
/b.h
