Ushtria ukrainase thotë se një ushtar është vrarë në një seri bombardimesh nga separatistët pro-rusë në Ukrainën lindore të shtunën në mëngjes dhe se përshkallëzimi i dhunës këtë javë ngre shqetësime se Rusia mund të ndërmarrë veprime ushtarake.
“Gjatë bombardimeve, një ushtar ukrainas u plagos për vdekje nga një fragment predhe,” konfirmoi administrata ushtarake në Ukrainën lindore.
Ushtria ukrainase shkruan në faqen e saj në Facebook se ka regjistruar 19 shkelje të marrëveshjes së armëpushimit nga separatistët të shtunën në mëngjes, krahasuar me 66 raste në 24 orët e mëparshme.
Donesk, qyteti i kontrolluar nga separatistët është zgjuar mëngjesin e sotëm nga shpërthime të fuqishme, sipas Reuters. Shpërthimet pasojnë paralajmërimet e përsëritura nga administrata e Biden se Rusia po përgatit operacione të “flamurit të rremë” për të justifikuar pushtimin e Ukrainës, duke përfshirë një sulm në kryeqytetin, Kiev.
Ministri i Jashtëm i Ukrainës, Dmytro Kuleba, ka thënë se forcat e vendit po tregohen të vetëpërmbajtur, pavarësisht bombardimeve intensive të artilerisë që nga e enjtja në të gjithë vijën e frontit në lindje.
Në një zhvillim të mëtejshëm, mediat shtetërore ruse pretenduan se ka ndodhur një shpërthim brenda territorit sovran rus në rrethin Tarasovsky të rajonit të Rostovit, afër fshatit Mityakinskaya.
Fatmirësisht askush nuk mbeti i lënduar.
Fotot e postuara në mediat sociale treguan një krater të vogël, rreth një kilometër larg nga kufiri ndërkombëtar me Ukrainën.
g.kosovari
