Kreditë me probleme kanë zbritur në nivelin më të ulët të katër viteve të fundit. Sipas të dhënave nga Shoqata Shqiptare e Bankave, shkalla e kredive me probleme në fund të nëntorit të vitit të kaluar zbriti në nivelin 19.9%, vlera më e ulët që nga Shkurti i vitit 2012.
Ndonëse rritja sasiore e kreditimit vijon të jetë e dobët, rënia e raportit të kredive me probleme mendohet të jetë kryesisht efekt i pakësimit të stokut të kredive të këqija, falë rikthimit ose fshirjes së tyre.
Stoku i kredive me probleme në fund të nëntorit ishte rreth 116.4 miliardë lekë, nga 119 miliardë lekë që ishte një muaj më parë. Krahasuar me një vit më parë, në vlerë absolute, kreditë me probleme janë ulur me afro 17%.
Statistikat tregojnë se parashikimi i Bankës së Shqipërisë për uljen e kredive me probleme poshtë nivelit të 20% brenda vitit është drejt përmbushjes. Ulja e kredive me probleme ka ndihmuar në përmirësimin e performancës financiare të bankave.
Fitimi progresiv i sistemit bankar për 11-mujorin ka prekur vlerën e 14.1 miliardë lekëve, në rritje të mëtejshme nga vlera e 13.5 miliardë lekëve e 10-mujorit. Në raport me 11-mujorin e vitit 2014, fitimi i sistemit bankar rezulton në rritje me 36%.
Rritja e fitimit ka ardhur si rezultat i njëkohshëm i rritjes së të ardhurave nga interesat dhe nga veprimtaritë e tjera, por, sidomos nga ulja e kostove të sistemit, për shkak të uljes së interesave të depozitave. /Dita/
