Policia gjermane ka ndaluar 31 të dyshuar, pasi ka kaluar vetëm një javë nga dhuna e ushtruar kundra qindra grave e vajzave natën e ndërrimit të viteve në Këln.
Mes tyre janë edhe 18 refugjatë që kërkojnë azil në Gjermani, bën të ditur zëdhënësi i Ministrisë së Brendshme gjermane, Tobias Plate.
“Nga 31 dhunuesit e natës së ndërrimit të viteve 9 janë algjerianë, 8 marokenë, 4 sirianë, por këtu nuk mungojnë as gjermanët, pasi dy nga sulmuesit janë shtetas të saj”, thotë Plate.
Angela Merkel, ka ashpërsuar tonet ndaj refugjatëve që thyejnë ligjet gjermane duke u marrë me krime, grabitje dhe dhunime. Ata i pret dëbimi i shpejtë. Mirëpo shumë ekspertë kërkojnë hapa më konkretë dhe se “nuk duhet të ketë tolerancë ndaj mos tolerantëve.”
Policia gjermane punon intensivisht për zbardhjen e tërësishëm të ngjarjes dramatike, edhe pse është e vështirë pasi mendohet se kanë qenë qindra burra të përfshirë në përdhunime, për të njejtën kohë.
Raste të ngjashme janë raportuar edhe në Hamburg, Salcburg dhe Vjenë.
