Kryeministri serb, Aleksander Vuçiç i ka bërë një telefonatë sot, homologut të tij kosovar, Isa Mustafa, për t’i ofruar ndihmë Qeverisë së Kosovës pas përmbytjeve që janë shkaktuar dje nga reshjet e mëdha të shiut.
Telefonatën e ka konfirmuar Qeveria e Kosovës dhe ajo e Serbisë.
Sipas zëdhënësit të Qeverisë së Kosovës, Arban Abrashi, Mustafa e ka falënderuar Vuçiçin për interesimin ndërkohë që i ka thënë se janë tejkaluar rreziqet dhe se në këtë fazë nuk ka nevojë për ndihmë.
“Kryeministri Isa Mustafa e ka falënderuar z. Vuçiç për interesimin e shtetit fqinj, duke i bërë të ditur se institucionet lokale dhe qëndrore të Republikës së Kosovës kanë ndërmarrë të gjitha masat e nevojshme dhe se janë tejkaluar rreziqet, dhe se në këtë fazë nuk ka nevojë për ndihmë nga shtetet fqinje ose më gjerë”, ka thënë për Express Abrashi.
