Prokuroria e Tiranës përfundon hetimet dhe dërgon për gjykim kërkesën për shtetasit Shyqyri Cani dhe Arben Hida, të dyshuar se janë përfshirë në veprimtarinë e paligjshme të shitjes së armëve të zjarrit, raporton Balkanweb.
Hetimi ka nisur nga Prokuroria për Krime të Rënda, në bazë të informacionit të Policisë, sipas të cilit kishte dyshime se shtetasi Shyqyri Cani ishte përfshirë në veprën penale të “trafikimit të armëve dhe municionit”. Pas kryerjes së veprimeve proceduriale nga Prokuroria për Krime të Rënda, çështje iu kalua për kompetencë Prokurorisë së Tiranës, pasi nuk rezultuan elementë që e përfshinin të pandehurin Cani në veprën penale të “trafikimit të armëve…”, por në veprën penale të “prodhimit dhe mbajtjes pa leje të armëve të zjarrit”.
Në bazë të veprimeve të kryera nga Prokuroria e Tiranës rezultuan dyshime të mjaftueshme se shtetasi Cani u shiste “klientëve të ndryshëm” armë zjarri, sipas porosive të tyre.
Në kuadër të veprimeve proceduriale, me kërkesë të Prokurorisë së Tiranës, gjykata lejoi kontrollin e banesës së të pandehurit Cani, ku u gjetën një pistoletë tjetër, një automatik, krëhër dhe fishekë armësh. Në këto kushte, u kryer edhe arrestimi i shtetasit Cani nga ana e policisë.
Ndërkohë, këtyre rrethanave, iu bashkohen edhe disa veprime proceduriale që ishin kryer më parë nga Prokuroria për Krime të Rënda. Ndër këto veprime, të cilat ishin kryer nga Krimet e Rënda dhe që iu bashkuan fashikullit të Prokurorisë së Tiranës, rezultonte edhe një “blerje e stimuluar”. Për atë rast, shtetasi Cani është kontaktuar nga shtetasi Arben Hida, lidhje shoqërore e tij, i cili i kishte thënë se ka gjetur “një klient” për blerjen e një arme tip “Bereta”. “Blerësi” ishte një person i autorizuar për të realizuar blerjen e pistoletës, për të cilën pagoi 400 euro.
Pas “blerjes së stimuluar”, hetimi vijoi pa rënë në sy të të pandehurve, me qëllim provueshmërinë e faktit kriminal të “trafikut të armëve…”. Pas veprimeve proceduriale, rezultoi se të pandehurit ishin të përfshirë vetëm në veprën penale të “prodhimit dhe mbajtjes së armëve pa leje…”.
Në këtë kuadër, pas arrestimit të shtetasit Shyqyri Cani, u krye edhe arrestimi i shtetasit Arben Hida, për të cilët Prokuroria e Tiranës përfundoi hetimet dhe i dërgon për gjykim.
Balkanweb
