Në prag të ndërrimit të viteve, Telekom është angazhuar në mbështetje të fëmijëve të braktisur përmes një fushate të gjerë në rrjetet sociale, e cila ka për qëllim të rrisë ndërgjegjësimin dhe t`i ndihmojë ata. Për këtë arsye, Telekom Albania fton të gjithë përdoruesit shqiptarë të Facebook, që t`i bashkohen këtij misioni fisnik vetëm me një klik dhe për më tepër pa shpenzuar asnjë vlerë monetare.
Duke nisur nga 30 dhjetori në pikëtakimin më të ri në kryeqytet, @Telekom Community Store në zonën e ish-Bllokut, nis fushata virtuale #SHAREAHUG. Telekom Albania fton të gjithë ata që dëshirojnë të bëhen pjesë e kësaj nisme ndërgjegjësimi, të jenë të pranishëm për të dhënë kontributin e tyre modest në periudhë festash. Stenda e Vitit të Ri në @Telekom Community Store i mirëpret të gjithë ata që dëshirojnë të bëjnë foto për t`i ndarë me hashtag-un #SHAREAHUG.
Vizitorët në @Telekom do të kenë mundësi të kryejnë fotot në stendën speciale të Vitit të Ri dhe të marrin fotografitë e tyre të printuara si dhuratë.
Po ashtu, të gjithë përdoruesit e Facebook mund të bëhen pjesë e këtij misioni duke shoqëruar me këtë hashtag, fotot nga ambientet e tyre festive kudo që ndodhen.
Mjafton që fotot tuaja festive që ndani në Facebook të shoqërohen me hashtag-un #SHAREAHUG. Sa më shumë hashtag, aq më shumë tregojmë që jemi të ndërgjegjësuar dhe aq më i madh do të jetë kontributi për Djepin e Ëngjëjve, repartin e bebeve të braktisura 0-2 muajshe në maternitetin “Mbretëresha Geraldinë”. Një foto e shoqëruar me hashtag-un #SHAREAHUG mund të bëjë diferencën.
Kjo nuk është hera e parë që Telekom ndërmerr një nismë të këtyre përmasave për një kauzë sociale. Një vit më parë, Telekom është angazhuar në mbështetje të fëmijëve me sindromën Down përmes një fushate të gjerë në rrjetet sociale, ku qindra mijëra përdorues u solidarizuan duke shoqëruar postimet e tyre me hashtag-un #AMCDSA. Fushata kishte për qëllim rritjen e ndërgjegjësimit mbi nevojat e fëmijëve me sindromën Down dhe ishte hera e parë që një nismë e tillë për një kauzë sociale arriti përmasa kaq të larta sensibilizimi dhe solidarizimi.
Telekom Albania, si kompani e përkushtuar prej vitesh në angazhimin e saj social, është një nga kontribuesit dhe mbështetësit kryesorë të fëmijëve.
