Sot bëhen plot 103-vite nga dita e krijimit të Forcave të Armatosura të Shqipërisë. Me këtë rast Ministria e Mbrojtjes zhbilloi një ceremoni të posaçme ku merrnin pjesë Ministrja e Mbrojtjes Mimi Kodheli dhe drejtuesit më të lartë të ushtrisë.
Në fjalën e rastit, ministrja, Kodheli u shpreh se në këto 103 vite Forcat e Armatosura kanë kaluar shumë sprova, por për ta duhet të jemi të gjithë krenarë pasi në gjithë historinë e ekzistencës së tyre nuk u kthyen kurrë në agresorë.
“Ju duhet të jeni krenarë se sillni në 2015 vlera të paçmuara të ushtarakëve, i shërbyet flamurit dhe Atdheut, nuk u shndrruart kurrë në histori në forcë agresore. Mijëra prej jush kanë humbur jetën përgjatë gjithë kësaj historie në përpjekje për ekzistencën e Atdheut tonë..dhe Atdheu do jetë gjithnjë krenar për ta. Që prej 2009 jeni pjesë e organizatës më ta madhe euroatlantitke, NATO”, -tha Kodheli duke falënderuar të gjithë ata që punuan e kontribuuan që kjo ëndërr të bëhet realitet.
Ajo i kërkoi ushtarakëve të jenë gjithë të përgatitur për tu përballur me rreziqet që i kanosen aleancës, siç është terrorizmi.
“Kufijtë e aleancës janë të kërcënuar, rajoni në të cilin jetojmë është i përfshirë në vorbullat që krijohen në lindje dhe jug. Të përgatitemi për të përballuar të keqen” – tha Kodheli.
Ndërkohë Shefi i Shtabit të Përgjitshëm të Forcave të Armatosura, Jeronim Bazo, gjatë fjalës së mbajtur vlerësoi misionin e ushtarakëve që kanë dhënë kontributin për paqen në vendet në konflikt. Një vend të veçantë në fjalën e tij zuri përkujtimi i atyre që kanë humbur jetën në detyrë.
“Siguria e Shqipërisë varet nga vullneti ynë për të bërë çdo sakrificë, për të mbrojtur vendin. Sot është dita e duhur për të mbështetur të gjithë pjesëtarët e FA. Nder dhe respekt për ata që dhanë jetën në shërbim të vendit, përshëndetje për ata që ky përvjetor i gjen në krye të detyrës në misionin jashtë vendit Zoti i bekoftë trupat tona në misione jashtë vendit. Në këtë përvjetor, është momenti për të kujtuar ata që s’janë me pranë nesh fizikisht për tu përkulur para tyre për sakrificës së tyre sublime. Ne të gjallët nuk do ishim të vërtetë pa sakrificën e tyre” –tha Bazo.
