Sot shënohet dita e përfundimit të Luftës së Parë Botërore. Armëpushimi I para një shekulli hyri në fuqi më 11 nëntor të vitit 1918, duke i dhënë fund kështu luftës katërvjeçare, që la pas vetes të paktën 10 milionë ushtarë dhe miliona civilë.
Franca, epiqendra e konfliktit të parë botëror, është mikpritëse e ceremonisë ndërkombëtare, në të cilën po marrin pjesë më shumë se 60 udhëheqës botëror.
Presidenti i Shteteve të Bashkuara, Donald Trump, presidenti rus, Vladimir Putin, kancelarja gjermane, Angela Merkel, janë në mesin e udhëheqësve botërorë që po marrin pjesë në ceremoninë që filloi në orën 11, të ditës së 11-të të muajit të 11-të.
Merkel do të mbajë gjithashtu edhe fjalimin hapës, në krah të Sekretarit të Përgjithshëm të OKB-së, Antonio Guterres, në një konferencë të titulluar “Forumi i Paqes së Parisit”, që do të mbahet pas shërbesës përkujtimore në “Champs Elysees”, paraditen e kësaj të diele.
I organizuar nga presidenti francez, Emmanuel Macron, forumi në fjalë synon të nënvizojë rëndësinë e institucioneve ndërkombëtare për ndihmesën e dhënë në zgjidhjen e konflikteve, në parandalimin e luftrave dhe në përhapjen e prosperitetit. Kryeministrja britanike, Theresa May dhe Mbretëresha Elizabeth II do të marrin pjesë në një ngjarje më vete, në Londër.
Ne ceremoni jane edhe presidenti i Kosovës, Hashim Thaçi dhe i Serbisë, Aleksandër Vuçiç.
Të dy ata morën pjesë edhe në darkën e së shtunës të organizuar nga presidenti francez, Emanuel Macron.
Ata shtrënguan duart me njëri tjetrin por, nuk ka pasur ndonjë bashkëbisedim më të gjatë ndërmjet tyre, ndonëse ishte paralajmëruar mundësia që të ketë një takim të ndërmjetësuar nga presidenti francez.
Të enjten, ata dështuan të shënojnë ndonjë përparim në takimin e mbajtur në Bruksel më ndërmjetësimin e Bashkimit Evropian.
Presidenti serb, Aleksandër Vuçiç, u takua të dielën me kancelarin gjermane, Angela Merkel, e cila është më e zëshmja deri tash kundër ideve për ndryshimin e kufijve në procesin e normalizimit të marrëdhënieve ndërmjet Kosovës dhe Serbisë./a.ç
