Prokuroria e Fierit ka lëshuar masa sigurie për 10 zyrtarë të Drejtorisë Rajonale të Shërbimit të Transportit Rrugor Fier, të akuzuar për korrupsion dhe shpërdorim detyre.
Hetimet kanë zbuluar se punonjës të Qendrës së Kontrollit Teknik kanë lejuar kalimin në kontrollin teknik të automjeteve me defekte të mëdha, duke vënë në rrezik sigurinë e qarkullimit rrugor.
Për këto veprime ata akuzohen për “Shpërdorim detyre” në formë të përsëritur.
Ndërkohë, dy persona të tjerë, D.H. dhe J.Q., dyshohet se kanë dhënë 2 mijë lekë ryshfet për të kaluar në kontrollin teknik automjetin e tyre, duke konsumuar veprat penale të “Korrupsionit aktiv” dhe “Korrupsionit pasiv”.
Nga hetimet është zbuluar gjithashtu se një tjetër person, D.N., i ka ofruar përfitim të paligjshëm një punonjësi të Qendrës së Kontrollit Teknik, i cili jo vetëm e ka kaluar mjetin në kontroll, por nuk e ka kallëzuar rastin në organet e drejtësisë.
Prokuroria Fier ka nisur ndjekjen penale për veprat “Shpërdorimi i detyrës”, “Korrupsioni aktiv dhe pasiv i personave që ushtrojnë funksione publike”, si dhe “Moskallëzimi i krimit”.
“Në kuadër të hetimeve mbi procedimin penal nr. 1173, datë 14.09.2023, filluar mbi bazën e materialeve të referuara nga ana e Drejtorisë Vendore të Policisë Fier, rezultoi se ka dyshime të arsyeshme se shtetasit A.M, S.K, M.G., E.S., J.V, L.M. dhe E.Sh., punonjës të Qendrës së Kontrollit Teknik, pranë Drejtorisë Rajonale të Shërbimit të Transportit Rrugor, Fier, gjatë ushtrimit të detyrës së tyre si specialistë të kontrollit teknik, me veprime dhe mosveprime, kanë nxjerrë kalues në kontrollin teknik automjete me defekte teknike që përbëjnë rrezik për qarkullimin rrugor, që pëmbajnë elementë të veprës penale “Shpërdorimi i detyrës”, kryer në rrethanën rënduese “më shumë se një herë”, parashikuar nga neni 248 dhe 50, gërma “h”, të Kodit Penal. Po ashtu, ka dyshime se personat nën hetim D.H. dhe J,.Q., në bashkëpunim me njeri-tjetrin i kanë dhënë shumën prej 2000 (dy mijë) Lek punonjësve të DRSHTRr, Fier, për të nxjerrë kalues në kontrollin teknik automjetin e shtetasit nën hetim J.Q“, thotë Prokuroria.
