Partia Socialiste përkujtoi sot në Roskovec ish-deputetin e saj Fatmir Xhindi, i cili u vra 10 vjet më parë.
Në ceremoninë ku veç deputetëve të zonës ishte i pranishëm dhe kreu i Kuvendit Gramoz Ruçi, kreu i grupit parlamentar të socialistëve Taulant Balla kujtoi një prej amaneteve politike të Xhindit.
Taulant Balla: Një prej amaneteve politike të Fatmirit ishte se “Shqipëria nuk ka nevojë për beteja, por për bashkëpunim mes partive politike”. Kolegët kur kanë ardhur në Roskovec me 3 maj 2009, erdhëm me krahë të prerë sepse ishte larguar për arsye ende të panjohura një prej njerëzve më të rëndësishëm të grupit parlamentar.Jam krenar për djalin e Fatmirit, Anduelin. Ne nuk e kemi harruar detyrën. Një krim që goditi opozitën, por ne kurrësesi nuk ngritëm asnjëherë dorën dhe gishtin.
Balla tha se janë krejtësisht të keqardhur nga veprimi i drejtësisë për këtë çështje.
Taulant Balla: Terësisht të keqardhur nga mosreagimi i institucioneve për ta zbardhur këtë çështje. Drejtësia e re që po lind do ta zbardhë këtë çështje dhe kushdo që ngriti dorë për deputetin e PS-së do të marrë dënimin e merituar.
Edhe djali i të ndjerit, deputet në Kuvendin e Shqipërisë, apeloi institucionet të zbardhin vrasjen.
Anduel Xhindi: U bë 10 vjet dhe drejtësia nuk e ka thënë ende fjalën e saj.
U vëj thirrje institucioneve për ta zbardhur sa më shpejt që shpirti i tij të bjerë rehat.
Petro Koçi: Sa të jemi gjallë dhe sa të jemi aktiv në politikë çdo hap do ta hedhim bashkë me Fatmir Xhindin.
Majlinda Bufi: U bëj thirrje institucioneve që të zgjidhin këtë enigmë dhe të vënë përpara drejtësisë autorët e kësaj ngjarje.
g.kosovari
