Një burrë nga Holanda ka sakrifikuar kaq shumë për dashurinë saqë ka përfunduar në spital. Alexander Pieter Cirk, 41 vjeç, udhëtoi nga Holanda për në provincën Hunan në Kinë për të takuar një vajzë që e kishte njohur online, e cila quhet Zhang.
Ai ka pritur 10 ditë në aeroportin Changsha, derisa përfundoi në spital.
Cirk tha për mediat kineze se ai e ka njohur 26-vjeçaren Zhang online para 2 muajsh. Ai, i lumtur u nis për ta takuar, por kur arriti aty askush nuk po e priste. Pasi qëndroi për 10 ditë, për shkak të rraskapitjes përfundoi në spital.
Ai vuan nga diabeti dhe u rëndua shumë për shkak të lodhjes.
Pasi ka dëgjuar ngjarjen, vajza ka telefonuar në Hunan TV dhe tha se holandezi i kishte dërguar një foto të biletës së avionit, por ajo nuk e kishte kuptuar për çfarë bëhej fjalë. 26-vjeçarja ka rrëfyer se kur Cirk kishte mbërritur në aeroport, ajo po kryente një ndërhyrje kirurgjikale estetike në një provincë tjetër dhe e kishte të fikur telefonin.
Zhang shton se vazhdon të jetë e interesuar për ta vazhduar lidhjen me Cirk, me të cilin në fillim kishin rënë dakord që të prisnin një vit para se të takoheshin.
BW/d.i.
