Rreth 1.6 ton drogë u kapën nga policia greke tre ditë më parë në një operacion të madh që përfshiu një numër të madh efektivësh policie, të Rojës Bregdetare greke dhe madje edhe Frontex. Rreth 11 persona u arrestuan, ndërsa policia ka folur për një ‘boss’ nga Shqipëria.
Po sot gazeta “To Vima” shkruan se grupi kriminal paguante 50-60 mijë euro për vendosjen e motorëve në gomone që të ishin gati për udhëtim. Disa nga gomonet i deklaronin si të shkatërruara nga zjarri. Grupi ishte i trajnuar për taktika anti-ndjekje dhe përdornin automjete me targa të huaja.
Shumë nga të arrestuarit kishin përgjegjësi vetëm për ruajtjen dhe mirëmbajtjen e gomoneve. Një pjesëtar kryesor i grupit konsiderohet një 31-vjeçar me shtetësi italiane dhe origjine shqiptare, i njohur me pseudonimin “Vito”.
Ndërsa televizioni “ANT1” shkruan se greku i arrestuar që kishte parking gomonesh është djalë polici. Nëna e tij shprehet se këtë gomone ai e mbajti tre muaj në parking thjesht në ruajtje. “E thamë 100 herë nuk është i përzier në gjëra të tjera. Çdo njeri mund të ngatërrohet kështu. Është i pafajshëm”, deklaronte nënë e tij.
“Kathimerini” raporton sot se grupi arriti në mes të shtatorit të trafikojë nga Shqipëria në Turqi një sasi të madhe hashashi. Avokati Gianis Glikas tha për klientin e tij Spiros Kardhimas se “Është rrota e fundit e makinës, e cila operonte në raste urgjente”. /BalkanWeb
