Nga Eduard Zaloshnja
34.5 mijë votat që mori Benet Beci në Bashkinë Shkodër më 14 maj janë bërë objekt analizash e komentesh nëpër TV-ra e portale. E mesmja shumëngjyrëshe e shumicës së këtyre analizave/komenteve është që, votave të parvjetshme të PS+PSD, iu shtuan edhe votat e parvjetëshme të degës shkodrane të ish-LSI-së, për të arritur tek 34.5 mijë votat e Becit.
Është e vërtetë që po të mbledhësh mekanikisht 25,656 votat e parvjetshme të PS+PSD me 7,880 votat e degës shkodrane të ish-LSI-së, arrijmë në 33.5 mijë vota. Por kjo është një aritmetikë tejet sempliste elektorale…
Së pari, bazuar në koeficientët zyrtarë të vdekshmërisë dhe të migracionit, rreth 1.5 mijë votues të parvjetshëm shkodranë të PS+PSD+LSI janë larguar këto dy vitet e fundit nga kjo botë, ose nga Shkodra, ose nga Shqipëria. Janë thjesht fakte të jetës shqiptare – ca vdesin e ca migrojnë…
Së dyti, jo 100% e votuesve të parvjetshëm të majtë që kanë mbetur në Shkodër kanë shkuar domosdoshmërisht të votojnë (një për një) më 14 maj. Nga një vrojtim rigoroz statistikor që dizenjova e drejtova para zgjedhjeve në gjithë terrenin e Bashkisë Shkodër (nga Alpet deri poshtë në det), rezultoi se vetëm 80% e votuesve potencialë të Becit kishin votuar parvjet – 20% e tyre nuk kishin votuar parvjet për asnjë parti. Për më tepër, 1/3 e votuesve potencialë të Becit rezultonin në grupmoshën 18-14 vjeç.
Me pak fjalë, 34.5 mijë votat që mori Benet Beci në Bashkinë Shkodër më 14 maj duket se kanë qenë një përzjerje votash të parvjetshme të PS-së, të PSD-së, të ish-LSI-së, dhe të të rinjve 18-34 vjeç, që nuk kishin votuar parvjet…
