Dashi: Me Mërkurin në anën tuaj, nuk do ta keni aspak të vështirë të gjeni aleatë si në aspektin profesional edhe në atë personal. Ditët më me fat të mbushura me takime dhe argëtime do të jenë e marta dhe e mërkura. Do të kaloni një Vit të Ri të gëzuar. Bëni kujdes në fundjavë, ku si pasojë e pozicionimit të Hënës mund të ndiheni disi nervozë dhe jo gjithçka mund të shkojë sipas parashikimeve tuaja.
Demi: Këto ditë festive do të jenë të mbushura me tensione, sidomos nëse nuk keni arritur të bëni paqe me partnerin. Venusi në pozicion të pafavorshëm do të ndikojë që të ndiheni nervozë dhe të keni mosmarrëveshje në çift. Për fat, do të keni mbështetjen e Marsit që do t’ju ndihmojë të përballeni me çdo vështirësi. Të enjten dhe të premten më në fund do të gjeni pak qetësi.
Binjakët: Ditët në vigjilje të festave mund të jenë të qeta për të gjithë, por jo për ju. Do të hasni vështirësi në kryerjen e detyrave, sepse Marsi dhe Mërkuri janë vendosur në pozicion të pafavorshëm. Prandaj mund të ndiheni të lodhur dhe apatikë. Ditët më të vështira do të jenë e enjtja dhe e premtja. Ndërsa ditët me fat e shtuna dhe e diela.
Gaforrja: Do të kaloni shkëlqyeshëm këto ditë në vigjilje të festave. Hëna më datë 24 do të shkëlqejë në shenjën tuaj, duke ju dhuruar një ditë të mbushur me gëzime dhe argëtime. Venusi do të ndikojë që të përjetoni emocione të forta. Marsi do t’ju dhurojë energji për t’i shijuar në maksimum festat. Këshillohet të bëni kujdes të shtunën dhe të dielën, kur mund të hasni ndonjë të papritur…
Luani: Këto ditë festimesh do të arrini t’i lini mënjanë mendimet e këqija, të harroni tensionet, që gjatë kësaj periudhe po bëhen gjithmonë e më të forta, sidomos nëse po përjetoni një situatë sentimentale jo shumë të qartë. Të martën dhe të mërkurën Hëna do të shkëlqejë në shenjën tuaj dhe do të ndjeni se jeni të rrethuar nga dashuria. E shtuna dhe e diela do të jenë gjithashtu ditë me fat.
Virgjëresha: Këtë javë do të ndiheni disi të lodhur, por edhe do të përfshiheni nga atmosfera e festave dhe do të përjetoni momente qetësie, sidomos në ambientin familjar. Venusi do ta mbrojë lidhjen tuaj dhe ju dhuron partneritet në çift. Këshillohet të bëni kujdes në marrëdhëniet me kolegët. Ditët më me fat do të jenë e enjtja dhe e premtja.
Peshorja: Hëna do të kthehet nga shenja juaj në vigjilje të Vitit të Ri dhe ditëve të mbushura me nervozizëm do t’u vijë fundi. Kësisoj do të kaloni një javë të qetë, sidomos të shtunën dhe të dielën, ku nuk do të mungojnë edhe argëtimet. Mund të jeni në shoqërinë e një personi të veçantë për ju, ndërsa për beqarët parashikohen takime interesante…
Akrepi: Në ditën e Vitit të Ri mund të ndiheni disi melankolikë, për shkak se Hëna do të jetë në pozicion të pafavorshëm. Por, nuk ka asgjë për t’u shqetësuar. Do të keni gjithsesi mbështetjen e Venusit dhe do të jeni në praninë e partnerit, që me dashurinë që ka për ju do të arrijë t’jua ngrejë humorin. Ditët më me fat do të jenë e enjtja dhe e premtja. Edhe Marsi ju favorizon duke ju dhuruar formë të mirë fizike dhe shumë energji.
Shigjetari: Java e fundit e vitit do të jetë për ju një festë e vërtetë. Do të jeni të rrethuar nga miq dhe të afërm, të mbushur me dashuri dhe gati për të ngritur dolli. Me praninë e Hënës në shenjë, fati do t’ju buzëqeshë. Po kaq e mbarë do të jetë edhe fundjava. Edhe në aspektin profesional situata do të jetë pozitive, do t’ju njihen meritat në punë dhe do të keni të ardhura të mira.
Bricjapi: Në vigjilje të festave, Hëna do të jetë kthyer në pozicion të pafavorshëm për shenjën tuaj dhe ju mund të ndiheni disi nervozë. Por mos u shqetësoni, sepse Venusin dhe Marsin do t’i keni në anën tuaj dhe do të keni gjithë mbështetjen e nevojshme nga një person i veçantë për ju. E enjtja dhe e premtja do të jenë ditë me fat. Dashuria do t’ju buzëqeshë dhe për beqarët parashikohen takime të bukura.
Ujori: Në ditët e fundit të vitit mund të përjetoni një situatë jo dhe aq të këndshme, sepse Hëna do të jetë në pozicion të pafavorshëm. Nuk është asgjë serioze, por ju mund të jeni në humor të keq, sidomos për shkak të situatës tuaj sentimentale. Për fat, Mërkurin do ta keni aleat dhe do të jeni të rrethuar nga ngrohtësia e miqve dhe të afërmve dhe nuk do të ndiheni asnjëherë vetëm.
Peshqit: Këto ditë të fundit të vitit do të përjetoni pasione dhe ndjenja të forta. Venusi në shenjën tuaj do t’ju dhurojë emocione të bukura dhe Marsi do t’ju japë atë shtysën që ju mungon. Bëni kujdes, sepse mund të keni ndonjë mosmarrëveshje në punë dhe në familje për shkak se Mërkuri është në pozicion të pafavorshëm për shenjën tuaj. Në fundjavë do të jeni shumë me fat.
