Amerikani Michael Norman ka thyer rekordin e botës në 400 metra vrapim në palestër, kur të shtunën në Teksas regjistroi kohë prej 44.52 sekondave, në kampionatin e kolegjeve të SHBA-së.
Për Normanin ishte vetëm vrapimi i tretë në një finale të 400 metërshit në palestër. Ai vrapoi për 0.05 sekonda më shpejt se rekordi i kaluar, që e mbante amerikani Kerron Clement, transmeton “Koha Ditore”. Clement e kishte vendosur rekordin në vitin 2005, po ashtu në kampionat të kolegjeve në SHBA.
Norman 20-vjeçar ishte i pesti në kualifikime të SHBA-së në 200 metra për Lojërat Olimpike “Rio 2016”, ndërsa fitoi më vonë atë vit medaljen e artë në 200 metra vrapim në Botërorin e juniorëve. Norman është pjesë e Universitetit të Karolinës Jugore.
Në të vërtetë gara ishte aq e fortë, sa që pesë garues në finale të kolegjeve në SHBA vrapuan kohë më të shpejtë se që kishte vrapuar fituesi i të artës në Botërorin e palestrës fundjavën e kaluar në Birmingham.
Koha fituese në Botëror ishte 45.47 sekonda. I dyti në finale në SHBA ishte xhamajkani Akeem Bloomfield me kohë 44.86 sekonda, duke regjistruar kohën e gjashtë më të shpejt në histori të 400 metërshit në palestër. I treti ishte Mylik Kerley me kohë 45.16 sekonda… (b.an)
