Sofia, një nga bashkëpunëtoret e Arian Çanit në emisionin e tij, “Zonë e Lirë”, nuk është shfaqur në ekran të premten e kaluar. Mungesa e biondes, emri i vërtetë i së cilës është Romina Alku, ka ngjallur shumë kureshtje, por Çani nuk ka dhënë ndonjë shpjegim.
I pyetur në lidhje me këtë, Ledio Topalli, regjisori i programit, thotë për “VIP Pages” se Sofia është larguar përfundimisht nga emisioni.
Mbi arsyet që e kanë çuar bukuroshen e “Zonë e Lirë” drejt këtij vendimi dhe nëse është e vërtetë që është larguar vetëm prej një batute të Çanit, Ledio përgjigjet: “Çani nuk është prononcuar për këtë çështje, kështu që as mua nuk më takon të prononcohem, megjithatë, për sa kohë ai nuk ka folur, do të thotë që nuk i ka dhënë rëndësi kësaj gjëje”.
Ledio shton: “Ka ikur ajo Sofi, është një Sofi tjetër. Ajo nuk e kishte emrin Sofi, mund të vijë dikush tjetër nesër, apo dikush tjetër më vonë. Sofia nuk është tapi aty, por një karakter që për 5 vjet u luajt si rol nga ajo dhe tani po luhet nga një tjetër”.
Ndërkohë, burime të “VIP Pages” kanë treguar se pas largimit nga puna Romina ka ndërruar numër telefoni dhe është larguar për në Gjermani. Nuk dihet nëse atje e pret i fejuari, apo Romina ka shkuar vetëm për pushime, sidoqoftë, ajo që mund të themi me siguri është fakti se Sofia nuk do të jetë më pjesë e “Zonë e Lirë”. Tashmë ajo është zëvendësuar nga një tjetër vajzë, e cila si për kontrast është brune.
Ajo është një 19-vjeçare nga Gjirokastra, e cila tregon se si u bë pjesë e këtij programi. Edhe pse prej disa kohësh merret me modeling, ajo na rrëfen se fama që ka marrë në emisionin e së premtes mbrëma e ka habitur. Si personi më i afërt me moderatorin karizmatik, ajo na tregon edhe batutat që shkëmbejnë mes tyre. Por syrit prej perfeksionisti të Çanit nuk i shpëtojnë edhe ndryshimet që Andonia duhet të bëjë në pamjen e saj.
Si u bëtë pjesë e “Zonë e Lirë”?
Gjithçka nisi kur u largua ‘Sofia’ e parë. U bë një audicion, ku Çani përzgjidhte edhe vajzën që do ta zëvendësonte. U përzgjodhëm dy, unë dhe një vajzë tjetër.
A do të jeni edhe të premten e ardhshme pranë Çanit te “Zonë e Lirë”?
Për këtë nuk mund të flas.
Si u ndjeve gjatë puntatës së parë te ky format?
Isha shumë rehat. Mund të them se ishte gallatë, u ndjeva pikërisht si në shtëpinë time.
Keni punuar disa kohë modele, por famën e njohët të premten mbrëma te Çani; si e përjetuat këtë famë?
Të them të drejtën ishte diçka që më habiti. Sapo nisi emisioni, kam parë lajmet nëpër portale që shkruanin për mua. As nuk e di ku e gjetën emrin tim apo gjithçka tjetër që dinin, por lajmi kishte bërë një jehonë të madhe. Për mua ishte diçka e madhe dhe shumë e bukur. Nuk e mendoja se do të kishte kaq sukses që në daljen time të parë. Më vjen mirë që mora gjithë këtë mbështetje në televizion.
Sa ju ngacmoi Çani me batuta në puntatën e parë?
Nuk më ka ngacmuar në asnjë moment. Normalisht nuk mund të bënte ngacmime të tilla, pasi e dinte shumë mirë se si isha para se të bëhesha pjesë e stafit.
Çfarë batutash bën Çani me ju?
Më shumë janë komplimente sesa batuta. Pas puntatës së parë, më ka thënë shumë gjëra në fakt. “Je një yll, perlë, e shikon që funksionoi”, komplimente të kësaj natyre më së shumti. Nga ana tjetër më ka dhënë edhe shumë këshilla, sidomos te pjesa e pamjes sime, pasi kam disa gjëra për të rregulluar.
A mendoni se do të mund ta zëvendësoni ‘Sofinë’ e parë, që ka disa vite pjesë e “Zonë e Lirë”?
Nuk mund të them që nuk e zëvendësoj dot. Realisht puna nuk është aq e vështirë. Rëndësi ka që ti të bësh gjithçka që Çani të thotë. Këtë bënte edhe ‘Sofia’ e parë, që ishte shndërruar në shpirtin binjak të Çanit, pasi merreshin vesh vetëm me sy. Puna ime është që të qëndroj si një imazh te “Zonë e Lirë”. Mendoj se e bëj më së miri këtë pjesë.
